楊哲安出戰南區 自言勝算唔大

【明報專訊】教育局前政治助理、自由黨嘅楊哲安噚日報名出選南區薄扶林區議會議席，身為黨內元老嘅楊爸爸楊孝華都有陪佢一齊去。楊哲安同Emily講，話佔領運動係令佢想回歸政壇嘅主因之一，認為運動係違法咁「阻人搵食」。不過，佢話覺得自己嘅勝算其實唔大，因為嗰區嘅現任區議員司馬文（Paul Zimmerman）已經做咗好耐地區工作，而自己嘅優勢可能係識講廣東話，同非外籍選民溝通較為方便。


自由黨主席田北俊早前話政治議題或者影響今屆選情，佢話估計唔到佔領運動同政改對自由黨選情有乜影響，但相信會有更多人因為政治議題走出嚟投票。唔少政黨今屆都派出新星、明星參選，積極部署爭取下年立法會超級區議會議席，咁佢有無諗住跟隨爹哋步伐出戰立法會？佢就話下年唔會，但長遠係點，就要長遠先講。


現職獵頭公司嘅楊哲安，若要兼顧政商，難免會少咗時間喺屋企，佢老婆張新悅有無詐型？佢話太太一開始都有微言，但後來都支持佢，而3個女喺區選期間嘅「工作」，就係乖乖留喺屋企互相照顧。


另一邊廂嘅新民黨田北辰，噚日都報咗名競逐連任荃灣愉景區議員，同區對手會有佢嘅前僱員、工黨趙恩來。