大嘥鬼新造型 嘴藐藐多粒墨

【明報專訊】近年唔少政府部門都有開設facebook專頁，當中又以環保署宣傳惜食運動嘅大嘥鬼較受歡迎，但係自從警隊今個星期一推出專頁，短短幾日已有逾3.8萬讚好，超越只有2萬讚好嘅大嘥鬼專頁。有網民公然撥火，喺大嘥鬼專頁留言話隔籬四點鐘許sir個page更多like，大嘥鬼（圖）亦不甘示弱，為咗宣傳辦公室環保採購，噚日換新裝，戴咗個眼鏡，塗埋紅色唇膏，嘴邊仲多咗粒墨。


呢個嘴藐藐嘅造型，即時為大嘥鬼挽回唔少人氣，除咗有600多次讚好，仲有40幾個留言，有網民話個造型似「葉太」，又有人話似「林鄭」，最好笑係「星星局長扮女人」，但Emily發現局長不但唔嬲，仲對呢個新造型讚好，仲留言話「大嘥鬼有男有女有老有嫩更或係你」。


大嘥鬼搞咁多嘢，無非都係想話政府嘅環保採購清單，由2001年103種增至現時150種，為政府減碳，可謂用心良苦。