總裁慈善單車遊 報名位位1.5萬

【明報專訊】今個星期六、日，旅發局將會首辦香港單車節，據聞唔少名人都會參與，除咗東亞銀行執行董事兼副行政總裁李民斌（圖）之外，同場仲有郭炳聯同蘇錦樑。當日佢哋會齊齊參與「總裁慈善單車遊」，小琴聽講，報名費每位承惠1.5萬，並全數捐予慈善機構，認真出錢又出力！


「總裁慈善單車遊」嘅賽道長2.5公里，單車手需沿住尖沙嘴梳士巴利道同麼地道踩。李民斌話，當年喺寄宿學校讀書嗰時，已經成日以單車代步，包括返學同穿梭唔同嘅大街小巷。雖然已經事隔多年，甚至連佢自己都話﹕「開頭都驚技術生疏！」但好彩練咗幾次之後，相信都可以應付到，而且喺練習過程中，仲發現咗唔少風景優美嘅單車徑㖭！


至於另一場「35公里挑戰組」，就有龐寶林、連敬涵同潘鐵珊參與，由尖沙嘴出發，上昂船州大橋同青馬大橋，真係少啲耐力都唔得！

email: [email protected]

[小琴密語]