17團體周末大會操 包括青少年軍

【明報專訊】民政事務局今個禮拜六下午1點喺維園足球場舉行「制服團體日」，屆時14個制服團體及3個青少年團體會表演大會操，市民免費入場，參加者包括今年初成立嘅青少年軍。香港升旗隊總會成員蔡一正今次將擔任總旗手負責升旗儀式，名副其實「擔大旗」。雖然近年有噓國歌情况，佢就話唔擔心到時會發生，相信出席嘅市民會好守紀律。


總旗手：不擔心噓國歌

2002年成立嘅升旗隊總會，係全港唯一打正旗號推廣升旗禮及國民教育嘅制服團體，唔好睇蔡同學18歲年紀輕輕，原來佢已經加入咗升旗隊近6年。對於3年前爆發嘅國教科風波，導火線之一係學生升國旗要感動流淚嘅課程指引，蔡同學就話，雖然升旗時自己唔會感動到喊，但會感受到自己作為祖國一分子嘅光榮。佢又唔同意有人焚燒國旗嘅行為，認為即使大家有唔同理念，都應該遵守法律同紀律。


表演團體之一嘅香港童軍總會歷史悠久，喺童軍服務咗22年嘅區域法院法官歐陽浩榮，細細個已獲選為模範童軍。佢感嘆當年參加童軍時，無乜嘢課餘活動，現今小朋友被安排各種興趣班、補習班，制服團體要留人都有啲困難。家有咁多制服團體，睇到人眼花撩亂，佢就溫馨提示小朋友同家長揀制服團體時，千祈唔好淨係揀件制服係咪型仔嘅，最緊要了解各團體嘅特色同活動。