選副主席 自由黨搞錯委員會 建制投票又甩轆

【明報專訊】建制派政改投票甩轆，自由黨「倖免」，但噚日自由黨都出事。立法會工務小組、人事編制委員會噚日先後選出新一年正、副主席，結果當然無驚喜，喺建制派擺明搶攻下，4個位置都由建制派出任。不過，工務小組副主席一職，原先協調咗由民建聯梁志祥做，但噚日突然彈咗個自由黨航運交通界議員易志明出嚟，原來因為自由黨「甩轆」，搞錯咗協調事情，建制派唯有臨時變陣囉。


易志明「忽然擔綱」工務小組

負責協調嘅民建聯葉國謙話，原本協調好易志明會做「發展事務委員會」副主席，點知各委員會報名一刻，易志明竟然無加入發展事務委員會，唔係委員，咁點選副主席呢？經了解後發現，原來自由黨搞錯咗，以為發展事務委員會，即係「經濟發展事務委員會」，而易志明一直關注嘅當然係經濟發展，想做經濟發展事務委員會副主席啦。就係咁，結果咪甩轆，而建制派嘅補救方法，就係叫本身想擔任工務小組副主席嘅梁志祥，同易志明對調囉。


呢個小小誤會，其實影響唔大，而易志明就話，傾協調時佢唔喺香港，所以出現咗誤會，現時喺無準備下擔任工務小組副主席，佢都樂於接受挑戰，又話自己都會返去熟讀相關條例，笑言「不過遲咗少少」。