做內委會副主席 馬逢國﹕每周工時多6小時

【明報專訊】近期港鐵處理市民攜帶樂器搭車事件引起唔少人關注，估唔到今次連「體育、演藝、文化及出版界」議員馬逢國都話好關心，全因佢嘅界別包括音樂界。港鐵雖然提出登記制度等新措施處理事件，但問題其實未解決，而馬逢國就話，10月22日晚上7時至9時喺灣仔小童群益會設論壇，請咗港鐵事務總監蘇家碧嚟講解，呼籲業界人士參加，向港鐵表達大家嘅關注。


馬逢國又話自己做事低調，講到端傳媒攝影記者關學津因為攜帶避彈衣喺泰國被起訴事件，傳媒行業其實都屬馬逢國嘅界別。佢話早前已去信泰國當局，話記者帶裝備去採訪係正常嘅事，佢尊重泰國法律，但要求當局撤銷檢控。


馬逢國啱啱做咗內委會副主席，有人恭喜佢，但佢話呢件係苦差，計過數以後每星期工時會多咗6小時，仲要成日留喺立法會唔走得。佢話以前做議員，可以開會期間溜出去參加業界活動，但今後就煩，仲未諗到點搞。