瑞信逆市招兵買馬

【明報專訊】A股暴力救市後，外資「心已死」。噚日就有外資行分析師同小琴講，已經放棄晒A股。不過，瑞信喺呢個時候反而逆市擴張，大舉招兵買馬，新增6位「A股專才」實A股。而瑞信今次招聘返嚟嘅，仲有前任瑞銀策略師嘅陳李！有留意開A股嘅讀者一定有聽過陳李呢個名，小琴都訪問過佢，清楚記得佢係舊年第一批睇好A股嘅策略師。當時佢曾預期，農曆新年前A股可升見3000點，市場當時個個都覺得佢幾aggressive，後來A股就好似坐上過山車，衝上雲霄。


除咗陳李，瑞信仲請咗5個A股分析師，包括覆蓋科技、保險、多元化金融、中國媒體及內銀範疇。內銀方面新加盟嘅分析師係黃潔，小琴都同佢有過一面之緣，靚靚仔仔咁，舊東家係中金。睇來今次瑞信真係不惜工本，要喺A股搞出名堂，遵循「別人恐懼我貪婪」嘅想法去逆市擴張，勁！


email: [email protected]

[小琴密語]