特首答問會 泛民無計劃抗議

【明報專訊】泛民主派過去喺政治氣氛緊張嘅時刻，會喺立法會特首答問大會向特首梁振英（CY）抗議，或集體離場以示不滿。今日CY又會去立法會出席答問大會，但民主派就話無計劃有抗議行動，泛民議員要把握機會提問喎。


根據過去嘅答問大會經驗，大約會有13、14個議員可以提問，過去累計問得愈少嘅，就愈有機會提問，大部分議員都問過3次，而醫學界梁家騮、經民聯劉皇發就只問過一次。


社民連梁國雄（長毛）過去只係提問過兩次，所以佢今日大有機會向CY問問題。Emily噚日問長毛打算問乜嘢，佢就賣關子話今日咪知囉，但長毛講明會問一啲對CY好公平嘅問題。


至於會唔會喺答問大會示威，長毛叫CY「唔使驚，立法會唔係戰場，到時亦唔會需要報案」，佢仲叫大家今日拭目以待。