「新思維」11人晤CY獻策

【明報專訊】由民主黨前成員狄志遠同黃成智牽頭成立嘅組織「新思維」，成立短短一個月，噚日雖然係重陽節公眾假期，但特首梁振英（CY）都抽時間同佢哋見面，聽吓佢哋介紹組織理念同政策建議。副召集人黃成智話，今次係佢哋主動拜會CY，形容會面氣氛輕鬆，CY仲好認真咁聽意見。至於CY有無講兩句鼓勵吓開拓第三條路嘅「新思維」？黃成智話無，大家主要交流意見。佢話遲啲仲會約見負責青年、安老及教育等政策嘅局長，講解政策建議。


倡區會18個減至8個

「新思維」噚日同CY會面後，發新聞稿向傳媒講述今次會面，話佢哋喺會上介紹咗青年發展、安老事務同地方行政等政策建議。「新思維」建議重組區議會，由18個大區減至8個，每個大區約有100萬人口；之後每10萬人設一個細選區，每個選區有3至5個議席。


除咗地方行政，「新思維」認為要增加諮詢委員會青年成員嘅比例，唔可以少過5%，以便年輕人聲音有效表達。黃成智會喺北區粉嶺南參選區議會，同區有獨立何樹光。