人力市場扭曲 長工不如炒散

【明報專訊】近日同一班做生意嘅朋友飯聚，原意係一齊食吓嘢嘆吓酒，怎知竟然變成訴苦大會，雖然內容確係令人唔開胃，但總算讓筆者了解多啲市道行情。席上眾位老闆都大嘆請人難，有尖沙嘴餐廳老闆話，如今請一位洗碗工，竟然要出到月薪萬二，等如《明報》請一個大學生做記者嘅薪水！


呢位老闆話，其實即使出到萬元，都只係跟同行爭同一批五六十歲嘅長者，因為即使再高薪，都唔會有後生仔女肯做，將來到呢批老人家再唔做得，到時除咗老闆自己落手洗碗，真係無其他辦法。至於近年出現嘅中央洗碗工場，就因為運輸成本同破損率太高，始終未能大行其道。


洗碗人工 等同大學生記者

洗碗工與大學生記者收取同等薪水，即使你話後者大把前途，前者無得加薪，都無人可以否定，香港目前嘅人力市場極其扭曲，人力供應同社會需求各走極端，才會出現上述一種情況。


高薪搶人 惠基層卻損企業

的而且確，Employee's Market讓香港維持了好一陣子嘅低失業率，基層收入增加，政府仲可以出嚟認吓叻，讚吓自己成功滅貧，但從僱主角度，事情就完全相反，長此下去更絕不能叫人樂觀。一個打工仔失業影響一個家庭，一間企業倒閉，隨時即響千百個家庭。


令我意外嘅係如今各行各業爭相以高薪搶人，仲摧生咗一種現象：散工代長工。席上來自不同行業嘅僱主，由於長期找不到長工，唯有以日薪、周薪請臨時工，由於太多人請臨時工(例如年尾酒席旺季)，導致臨時工的代遇仲好過長工！


隨住「炒散」有價有市，最近就開始出現「炒散」手機app，用法類似Uber搵司機，僱主或散工都可以登記員工需求或者個人專長，手機平台自動配對，筆者噚日就登記試用，用法仲簡單過Uber，仲可以即時同僱主僱員短訊對話，非常方便不想做長工的朋友「全職炒散」，仲可以每日即時留意行情，隨時按住市場價格「跳槽」，今日做完傳菜，明天又可以轉做街霸，聽落都幾過癮。本地勞動力一日未能補充，長工散工化可能會成為香港低技術勞動市場的「新常態」，呢種新經濟是好是壞，會帶嚟幾多後遺症，就值得大家慢慢觀察。


長工散工化成「新常態」

執筆之時，筆者身在海外，不時見到中國國旗，但無論如何都不能像梁特，會突然有衝動要下車拍照留念。梁特的擦鞋舉措故然令香港人側目，但更令筆者憂慮的，是未來一年是政治最敏感的時間，如此一種惡俗擦鞋文化一旦蔓延開去，難以保證北韓金正恩被民眾瘋狂簇擁的情況，不會在香港出現。


早前建制派各路人馬爭相講習大大的「一帶一路」，大家即使明白背後含義，還可以托詞是香港經濟發展機遇，但看見國旗隨即腦充血還要大聲歌唱祖國，實在不是香港人可以接受的一套。


[應正亮 廿四味]