新民黨參選人為「賄選」橫額解畫

【明報專訊】區議會選舉11月22日舉行，參選人嘅言行都要好小心，唔係會好易中招，好似沙田沙角選區競逐連任嘅新民黨楊倩紅，就畀對家黨派嘅人質疑，上載咗一幅橫額照片去社交網站，橫額係宣傳一間學校喺10月17日舉行嘉年華會，寫明街坊可以去楊倩紅嘅議員辦事處，免費索取門券同100元遊戲飲食代用券。


楊倩紅就喊冤，話自己唔係賄選。佢同Emily講，對於議員辦嘅名寫喺橫額度覺得錯愕，事前唔知道。佢話呢項活動係國際學校主辦，往年佢議員辦都有協辦，今年因為選舉，佢已講明唔方便參與，但之後校方話想佢幫手派門券，大概8月、9月校方放咗啲門券去佢議員辦畀佢分派。


佢話噚日已經聯絡校方，校方應承咗下星期會出番封信，解釋番件事。楊倩紅喺沙角選區嘅對手係新民主同盟嘅陳兆陽。