環署路邊測廢氣 司機大佬留意

【明報專訊】揸車嘅司機大佬，會好留意喺路邊嘅影快相超速攝影機，但司機仲要留意多一個可能會影響佢哋嘅裝置。原來環保署喺去年8月起引入咗路邊遙測儀器，監察咗56萬架次嘅汽油或石油氣車，仲向約3800名車主發出廢氣測試通知書，當中約200架車唔過關而被吊銷行車證。


環保署話，有別於柴油車排放黑煙，汽油同石油氣車釋出嘅廢氣，肉眼睇唔見，而路邊遙測設備就可以有效偵測維修不善而排放廢氣嘅汽油車。如果被發現排放超標，車主會收到廢氣測試通知書，需修理好架車，然後喺12個工作天內到指定測試中心，確認排放符合標準。如果車主未能按要求維修，咁行車證就會被吊銷。


環保署助理環境保護主任劉志浩接受政府新聞網訪問時話，汽車維修不善，排放物濃度會較正常高10倍，又話路邊遙測措施初見成效，今年上半年同去年同期比較，路邊空氣監測站錄得嘅車輛污染物水平均有下降，其中氮氧化物、二氧化氮和一氧化碳分別下降13%、7%和13%。