哈囉喂「酒鬼」熱捧威士忌 酒吧業料大賺

【明報專訊】威士忌近年好受歡迎，酒吧業協會早排做咗調查，發現近八成酒吧會喺萬聖節推出以威士忌做底酒嘅雞尾酒，另有近七成酒吧對萬聖節市道感樂觀。香港酒吧業協會副主席錢雋永話，紅酒炒價太誇張，威士忌剛剛先開始炒，有經驗嘅酒客會覺得用相同價錢可以飲到高質素威士忌，香港人識計數，自然識揀；而且年輕人愈來愈識飲酒，令威士忌熱潮勁，好多酒吧家有一半客人會歎支威士忌，男女都有。


為補威士忌「啃貨」買酒成本增

佢話威士忌價格比較高，增加酒吧業收入，例如一杯威士忌雞尾酒，價錢比普通雞尾酒貴一倍。


酒吧老闆姚文傑喺尖沙嘴同銅鑼灣有3間舖，佢話威士忌太好賣，有時向酒商補貨，對方會要求「啃貨」，同時訂埋其他相對冇咁好賣嘅酒類，雖然啲酒最終都用得着，但成本就大咗好多。至於萬聖節，往年客人一般10月先開始問萬聖節正日有乜搞，今年9月中已經落訂包場，可能因為舊年佔中大家冇心機狂歡，悶咗一年，今年仲唔諗定去邊玩咩！


另外，荷里活廣場率先公布萬聖節活動，10月31日將會有「哈囉喂狂歡酒吧」，只要喺商場消費滿100蚊，就可以享用威士忌雞尾酒或者無酒精特飲一杯。