我們都是「浸大」的

【明報專訊】浸會大學新任校長錢大康答應到我在《明報》的會客室，我一定會準備一些刁鑽的教育學術問題，我相信對於錢校長來說，是輕而易舉，因為錢校長是在學術教育領域裏「浸大」的。不過，錢校長的浸大與今次浸會大學60周年校慶的主題「我們都是浸大的」有所不同，主題的意思是我們都是浸會大學的。


星期三，浸大校務處通知要回大學出席60周年校慶記者招待會，錢校長穿西裝窄腳褲，唔打呔，以一副非常潮look見大家，學生一定受落，隔膜少咗，萬事都好商量。今次校慶，我都唔知有幾多個活動，不過，重頭戲就由鄭丹瑞擔大旗，我相信在打後幾個月，大家會在不同地方睇到不同宣傳片，包括我有份唱的校歌。


提出爆煲論 寧做醜人揭露事實

在記者會之後，校長問我點解咁大膽寫「細價樓爆煲論」，我話我是在地產行業浸大，睇到一些事情而一般市民未必可以睇到。雖然爆煲論會得罪一些人士，以及損害既得利益者的利益，但相比細價樓爆煲，社會受到影響之巨大，這些又微不足道。其實，業界很多人都睇到，不過，佢哋唔肯講，評論話我敢言，其實我做醜人。


爆煲論並不是我唯一與主流意見不同的一次，在2009年初，不少測量師、經濟學家、評論員排隊話樓價會大跌，我話不但唔會跌，反而會大升，有老友問我點解，我話，發表樓市大跌的測量師，不少來港都未夠3個月，東南西北都未分清楚，點樣評論？其他說樓市下跌的人，他們仍然租樓住，不是在樓市中浸大，又怎能夠評論樓市？結果是，2009年樓價大升，2009年底政府出招，至今仍未能夠全面解決房屋問題，其實主要的問題是，官員都不是在樓市中浸大，又怎樣了解樓價上升的真正原因？

紀惠集團行政總裁

[湯文亮 敢說亮話]