被摑梁太﹕齊昕無辜嘅 盼大家勿再騷擾女兒

【明報專訊】特首梁振英（CY）幼女梁齊昕萬聖節狂歡飲醉酒，當眾摑咗媽媽梁唐青儀兩巴；梁太（圖）噚日出席活動，傳媒問起齊昕，佢認真地強調齊昕需要空間休息，尤其係齊昕嘅私人活動，希望大家唔好再騷擾佢；又話無論大家對現狀同政制有幾唔滿意都好，齊昕係無辜嘅。


讚齊昕好心地無意冒犯人

女兒雖然動手，但梁太形容齊昕係一個好好心地、好善良、好鍾意動物嘅「細路女」。當晚情况混亂，齊昕同朋友玩完想走，但就被幾十個記者包圍，佢深信齊昕嘅舉動只係想保護朋友，唔想記者影到朋友。佢話「我相信、亦都深信佢嗰晚佢係有食……有啲飲醉酒」，至於有報道話齊昕講粗口，佢就話現場聽唔到。


記者追問被摑感受、係咪原諒齊昕，梁太繼續維護阿女唔係有心，「佢一切嘅行為舉止，當晚係無意、絕對無意，我深信佢係無意冒犯任何人，OK？多謝大家」。其後梁太由保安護送離開，邊行邊吸咗口氣。至於齊昕就喺Instagram上載咗一幅兩隻鹿卡咗喺欄杆嘅圖，留言話「so true」，和應圖中一句「就算同朋友一齊闖禍，至少都有朋友陪住」。網民反應兩極，有人留言撐佢唔使理其他人目光，繼續做自己，亦有唔少人話佢教壞細路，唔應該打阿媽。