歷史博物館展覽 老友記製懷舊藝術品

【明報專訊】由賽馬會資助、香港歷史博物館及「藝術在醫院」舉辦嘅「耆趣藝遊——賽馬會健腦行計劃」，舊年3月至今年8月期間，邀請長者參觀「舊香港」展覽，之後自製懷舊藝術品，包括竹織物、紙黏土點心等。Emily噚日去咗歷史博物館，欣賞佢哋嘅製成品展覽。84歲嘅馮婆婆好鬼馬咁用墨綠色嘅顏色筆，畫咗個「火水燈」，佢話自己好多年無畫畫，今次專登畫咗細個用過嘅火水燈，希望搵番舊日回憶。


九旬伯伯推着老伴欣賞

噚日亦有唔少長者出席，91歲嘅鍾伯伯推住坐輪椅、患有腦退化症嘅太太一齊到場，不時低頭同老婆講解吓見到嘅展品，見到婆婆不時點頭微笑，從兩人對望嘅瞬間，睇得出佢哋都好享受個展覽。


有興趣嘅朋友可於即日起至23號，去到尖沙嘴歷史博物館參觀公公婆婆嘅藝術作品。