太元邊供股邊買古錢茅台

【明報專訊】今時今日上市公司做嘅生意五花八門，由傳統金融地產，變化到做遊戲當舖皮草乜都有，不過噚日小琴見到太元集團（0620）出咗個公告，投資咗總共超過1億元去買一批古董錢幣同貴價茅台酒返嚟，同時宣布供股集資4.2億，問股東攞錢去玩古董同靚酒，認真吹脹。


斥逾億買古錢茅台

太元個公告話，分別會用7869萬元同2432萬元人民幣收購古幣同3700支茅台酒，究竟係咩古幣咁巴閉？

太元話包括811.4萬個中國古代、拜占庭帝國及薩珊王朝古錢幣，同埋5000套清朝古幣喎！

老實講，講收購古董，太元肯定唔係第一間，皆因「大劉」劉鑾雄，當年仲做緊華置（0127）主席時就曾經買落唔少值錢古董，不過華置配股集資紀錄唔多，但太元就供股嚟玩古董，每持五股供兩股，每股供股價3.1元，集資成4.18億元，除咗用嚟玩古董，仲有約4800萬用嚟還債，你話係咪高招呢？

[小琴密語]