勵晶變身「性趣股」 食正二孩熱

【明報專訊】近幾年投資焦煤生意嘅勵晶太平洋（0575），搞搞新意思。最新創舉就係提出全面收購專治男士早泄用藥PSD502 嘅英國另類市場上市公司Plethora，以Plethora全部發行股本計估值1.029億英鎊（約12.29億港元）。由於今次以換股形式全購，因此完成交易後，Plethora 變相喺香港主板上市，勵晶因此成為香港少數嘅性趣股。話都無咁橋，今鋪剛好食正內地二孩政策個浪。
勵晶估計，每四個男士中，便有一個可以因為PSD受惠。但係男士早泄有得醫之前，Plethora 喺今年上半年蝕水，大概蝕590萬港紙。
以換股形式全購Plethora
今次勵晶出重手，索性以每股作價12.5 便士，較Plethora 11月3日收市每股2.75便士，出價有溢價354.5%，全購Plethora。
勵晶今次只需印股票， 每股Plethora可換15.7076股勵晶股份，作為交易代價。現時PSD502 已獲歐洲批准作處方用藥，正向美國食品及藥物監督管理局提出新藥上市申請，長遠可以係亞太區實現商品化。