走出音樂廳 港樂響西九自由約

【明報專訊】Emily平時會去音樂廳聽吓古典音樂表演，但就未試過坐喺草地聽古典音樂。西九聽日搞第4次自由約，更加首度同香港管弦樂團（港樂）合作，邀請8名銅管樂手喺草地演奏，包括小號、圓號、長號、上低音號同大號。Emily同今次港樂指揮李少霖傾開，佢話今次特登揀咗7、8首大家耳熟能詳嘅樂曲，包括《仙樂飄飄處處聞》嘅組曲、柴可夫斯基嘅《1812序曲》等。


望改變古典樂「恐怖」形象

李少霖話，相比木管樂，銅管樂冇咁易受溫度同濕度影響，較適合戶外演出，演奏上亦加入爵士樂呢類娛樂性豐富嘅音樂元素。上低音號樂手Ben話，戶外唔會有咁多器材設備，演出嘅音色同一般音樂廳亦好唔同。


港樂教育及外展經理趙桂燕話，雖然演出只有半個鐘，但足夠觀眾淺嘗古典樂，引起興趣。西九管理局藝術發展主管（劇場）劉祺豐話，希望透過今次合作，改變市民對古典樂嘅印象，「古典樂唔係咁恐怖」。佢話今次自由約規模較細，主要喺中央草坪搞，可容納過千人，局方亦想喺西九公園開幕前，有定期活動試吓水溫。