90後設計黨Logo 新思維唔避忌見中聯辦

【明報專訊】由前民主黨成員狄志遠同黃成智牽頭成立嘅參政平台新思維，一直強調走「第三條道路」，噚日幾個成員同傳媒茶敘，佢哋強調對各方持開放態度，處事作風係着重理性、融和同溝通。新思維召集人狄志遠同Emily講，會陸續同各個政黨、政府、商界嘅代表會面，仲話唔會避忌見中聯辦，至於訪京日期就未落實。


至於嚟緊區議會選舉，狄志遠就話組織成立短短兩個月，選舉工程規劃得未夠全面，參選嘅手足都「咬實牙根」咁過，難以估計勝算。佢話主要展望下年換屆嘅立法會選舉，而明年2月嘅立法會新界東議席補選，佢話新思維積極考慮出選，區議會選舉後會盡快公布人選。


新思維亦公布新標誌，由90後女生幫佢哋設計嘅，標誌上面藍色同綠色嘅線條相交，用色係代表天同地，寓意兩個極端嘅思路總有交匯點，貫徹求同存異嘅理念。狄志遠話希望標誌有年輕同活潑嘅感覺，又話希望多啲年輕人參政，仲透露有一個學者會加入，不過就唔肯透露係邊位喇。