李慧琼為樹根平反 怪製作公司 民記自爆變咗「社民聯」

【明報專訊】鍾樹根參選區選嘅單張，將自己嘅英文名「Chris（Christopher）」寫成「Chirs」而被網上瘋傳；民建聯主席李慧琼（Starry）就話要幫樹根平反，將錯誤歸咎製作公司，仲話其實有部分民記兄弟姊妹都曾經差啲中招。Starry話，最離譜係試過製作公司將宣傳單張上「民建聯」及「新社聯」候選人，印成同社民連寫法相似嘅「社民聯」。咁大整蠱，唔通製作公司想搞兩黨聯婚？Starry話好彩佢哋喺出街前發現錯誤，否則實被人笑死。


Starry話，明白製作公司要喺區選支援民記百幾個候選人，承受好大壓力，不過佢認為呢種錯誤真係不能接受，因為無論邊個環節出錯，議員都要孭鑊，佢話區選後民建聯會檢討吓製作公司嘅配合問題。李慧琼都有參加區選，爭取喺九龍城土瓜灣北連任，對手有林依麗及沈泰鋒。


至於樹根，就對英文名出錯一事耿耿於懷，話今次好無辜，因為「Chirs」唔係出自佢手，事關佢已經校對過張海報第一同第二版，當時無出錯，點知最後一稿先出事。樹根噚日依然好激氣，同Emily強調「我唔會拼錯自己嘅名！」。


鍾樹根今屆區選喺東區漁灣爭取連任，對手有徐子見。