林鄭自爆24歲首次搭飛機

【明報專訊】呢期唔少人講「哪一天我們會飛」嘅話題，政務司長林鄭月娥都唔例外，噚日陪一班基層家庭大人小朋友參加港龍航空「讓理想起飛」活動，搭飛機喺南中國海上空暢遊。林鄭話自己都係24歲先第一次搭飛機離港，當時心情好緊張，擔心會否被入境處人員「盤問」同埋會被海關檢查行李；上到飛機又唔識扣安全帶同去廁所，形容第一次空中旅程嘅感受係戰戰兢兢。


林鄭噚日同170名基層市民參加活動，喺天空飛咗90分鐘。 呢次活動專門為「兒童發展基金」學員而設，畀未搭過飛機嘅學員同家人和師友一起體驗飛行。政府已投入咗6億元撥款，共有1萬多個基層兒童參與「兒童發展基金」嘅計劃，林鄭話相信部分參與活動嘅小朋友，可能會立志投身航空業衝上雲霄，但希望佢哋先要努力學習，鍛煉強健體魄，咁先可以為目標奮鬥。