最熟悉政治人物民調 特首第一

【明報專訊】雖然特首梁振英（CY）喺民望拎唔到第一名，但唔使灰心，因為CY榮登香港大學民意研究計劃嘅「香港巿民最熟悉政治人物」調查榜首，政務司長林鄭月娥排名第2，立法會主席曾鈺成就排第3。民研計劃經理李偉健分析話，政治人物排名榜係用嚟顯示政治生態嘅改變，以及量度知名度，同支持度無關。


調查喺11月2至5日進行，訪問員用隨機抽樣方式，以電話訪問1008個香港巿民。對比6個月前嘅結果，今次有8個政治人物蟬聯「十大」，上次排名第8嘅前政務司長陳方安生同埋第10嘅民主黨主席劉慧卿，今次跌出「十大」，前者排第11位，後者排12位。


佢哋嘅位置畀財政司長曾俊華同埋食物及衛生局高永文取代咗。財爺嘅排名上升6位，排名第6；高醫生就由排第17位，升到排名第10。