24警攞菲律賓太歷學位 非極速博士 進修5年

【明報專訊】近期Emily身邊聽到最多人講嘅海外大學，當然唔係哈佛或牛津，而係畀傳媒踢爆涉及可以畀錢快到16個月極速完成博士課程嘅「菲律賓太歷國立大學」啦。除咗樹仁大學一批講師持有太歷嘅博士學位，噚日又有人留意到原來有24個警務人員喺2011年攞到呢間「著名學府」嘅大學學位。


2011年警察內部刊物《警聲》，當時有水警北分區助理指揮官投稿，講起同另外23個警察一齊完成咗香港管理專業協會同太歷舉辦嘅「刑事司法理學士」學士課程，一齊喺嶺南大學嘅禮堂行畢業禮。


Emily一向都聽紀律部隊尤其警務人員講起，內部升遷競爭都好激烈，進修攞多個學位都會幫到升級。Emily睇番呢批太歷嘅警察畢業生，分別係2005、2006年開始一邊開工一邊讀書，睇番畢業時間，都用咗5年先讀完，唔係「極速」畢業，相信大家唔使諗太多。


警方：不評論個別人員學歷

警隊回覆話，唔評論個別人員學歷，但一向鼓勵人員終身學習，人員完成進修向管方提交嘅學歷證明，需要得到香港學術及職業資歷評審局認證，先至會記錄喺人事系統。