巴黎遇肥彭 陶傑傳話：港人掛住你

【明報專訊】聽日係區議會選舉，文化人陶傑無喺香港幫佢支持嘅候選人拉票，原來係去咗歐洲，仲係去咗啱啱發生恐襲嘅巴黎。佢噚日仲係facebook出帖，話喺巴黎同末代港督彭定康相聚，話肥彭仲好關心香港，而佢對肥彭講，好多香港人好掛住佢，仲有掛住佢3個囡囡。咁樣講，唔通陶傑都係懷緬殖民年代？


陶傑話，肥彭坐「歐洲之星」火車去巴黎，今年已經70歲，但頭腦仍然清晰。兩個人傾咗國際大事、中國問題、讀書心得，連陶傑都話獲益良多。陶傑仲同肥彭講，「我敢代表香港絕絕絕大多數人告訴你：香港人，包括跟隨過你工作的公務員，都很掛念你，以及你低調而優雅的三位女兒。你在香港五年，留下了許多。」


讚肥彭女兒低調優雅

陶傑形容肥彭嘅笑容好似個細路仔，肥彭話喺到寫緊一本為自己尋根嘅書。陶傑話，呢個曾經畀中國鬧係「千古罪人」同「婊子」嘅政治家，雖然做唔成首相，但仍然勇敢精彩咁生活。