「展昭」撐君堯 葉劉打「病倒牌」 小明改歌挺美芬

【明報專訊】區選決戰日，候選人都施展渾身解數，包括出動強勁助選團站台，好似新民黨主席葉劉淑儀，噚日就揸住「病咗 都撐」紙牌游走多區，希望感動選民投票畀黨友。若論星光熠熠，就非何君堯助選團莫屬，佢出動導演李力持、陳百祥，甚至「展昭」何家勁，不過，都唔及梁美芬助選團咁有娛樂性。


話說兒科醫生李家仁將其名作《小明上廣州》改編為《小明撐美芬》，率眾向梁嘅對手、青年新政嘅游蕙禎高歌，其音波功一度令游要合上眼集中精神先可以繼續嗌咪。


歌紙上寫住《小明上廣州》原作者韋然為其改詞，但韋然就唔願回應係咪出自其手筆。李家仁就話《小明撐美芬》「係韋然㗎」，透露對方噚日凌晨先完工；韋然及後坦言話有啲事「你哋傳媒認為好有趣，但好敏感」，佢想「保持沉默」。


兩前局長撐「獨立」鄧咏駿

另一邊廂，喺麗港城選區，尋求連任、報稱獨立嘅鄧咏駿，繼日前有立法會主席曾鈺成親臨助選後，兩任民政事務局前局長，包括74歲全國政協委員藍鴻震及早前「提早退休」後久未露面嘅曾德成，都現身撐場，引來鄧係「假獨立」嘅質疑。Emily多次嘗試致電鄧咏駿了解，但其手機接駁咗去辦公室，職員曾話佢要擺街站，唔方便親自受訪。


本身亦有參選嘅民建聯主席李慧琼則「犧牲小我」為人助選，但當佢獨自出現深水埗麗閣邨，欲撐工聯會小花陳穎欣時，卻不見陳嘅蹤影，李慧琼只好同小花紙板合照。陳穎欣到傳媒訪問後才急忙趕嚟補影，影相後被助理拉走，衝入地區辦事處避見傳媒，李慧琼就為佢解畫，話佢只係忙於拉票。