公仔影完即棄 回收商籲中大生惜物

【明報專訊】好多人包括畢業生都鍾意拎住毛公仔影相，但毛公仔轉頭可能就葬身垃圾桶。上周中文大學畢業禮後，該校垃圾回收商人員喺垃圾桶發現啲新簇簇嘅毛公仔，有啲連牌都未剪，於是收集起嚟，喺學生組織「免廢讀中大」嘅facebook呼籲同學，若真係要同公仔影相，就拎呢啲二手公仔嚟用，唔好再買喇。


學生組織促捐出 勿浪費

學生組織「免廢讀中大」成員伍朗希話，唔止係畢業禮，每年3、4月有畢業生影相日，好多人都會著畢業袍同毛公仔影相，擺到6月退宿時就棄置，有啲會畀「免廢讀中大」回收，有啲就掉落垃圾桶就算。佢希望同學唔好咁浪費，應該捐咗啲公仔。


迎新營有時都係浪費源頭㗎，伍朗希話，今年迎新營後，回收商喺垃圾桶見到成箱相信係資助迎新營嘅美白產品，又喺facebook質疑，迎新營搵贊助嚟做乜？中大回收商唔止處理廢物，仲會教育同學環保，伍朗希都讚佢哋好有心。