觀鳥節展出罕有禿鷲標本

【明報專訊】香港濕地公園即日起至出年4月舉辦「觀鳥節」，首次展出罕見冬季候鳥禿鷲嘅標本。標本體長超過1米，雙翼展開更達2.6米，全身有黑褐色羽毛覆蓋；今年1月有市民喺赤柱發現佢跌喺地下，經急救後不治，其後製成標本。禿鷲係本港體型最大嘅猛禽，威風凜凜，上一次喺香港現身要追溯到1998年初，所以今次展出嘅標本非常珍貴。


主題「鳥羽翩翩」 欣賞雀毛構造

今年觀鳥節以「鳥羽翩翩」為主題，同場仲會展出鸕鷀、黑臉琵鷺等多種雀鳥羽毛，畀訪客近距離欣賞佢哋精巧嘅構造，了解羽毛點樣幫助雀鳥翱翔天際。部分品種嘅羽毛仲會隨時間變化，好似大白鷺喺繁殖季節時，背部會長出飾羽，並伸延到尾部，外形優雅。


香港今年天氣異常炎熱，濕地公園展覽經理馬嘉慧話，習慣來港過冬嘅季候鳥仍然如期出現，但全球暖化對季候鳥遷徙路線嘅影響有幾大，就需要長時間研究同觀察。


觀鳥節期間除咗有展覽，另有導賞團、專題講座同「琵琵」襪偶製作班等，活動詳情可參考濕地公園網頁（www.wetlandpark.gov.hk）。