領展10年 盧少蘭繼續好火

【明報專訊】噚日係已改名為「領展」嘅領匯上市10周年嘅大日子，民間團體「領匯監察」十幾名成員去到領展旗下嘅樂富商場「賀一賀佢」，佢哋以街頭劇方式請願，諷刺政府多年來縱容領展犧牲小商戶同公屋戶嘅利益。當年以屋邨居民身分入稟阻止領匯上市失敗嘅盧少蘭婆婆都有出席，一把年紀嘅佢仍然中氣十足，大罵時任特首董建華「無鬼用」，賣咗屋邨商場令租金上升；又話領展無良心，要求政府一定要收購番。


「領匯監察」成員李翠琼話，領展10年來逐步將小商戶趕走，家有八成租戶都係大型連鎖店，但屋邨居民多數係基層，佢不時收到街坊投訴話，無辦法喺邨內商場買到較便宜嘅貨品，要求政府先回購部分對民生影響較大嘅商場。