英御前樂團到校表演 教基層學生

【明報專訊】曾經喺英國威廉王子婚禮中演出嘅倫敦室樂團應垂誼樂社邀請，噚日到循道學校表演，等多啲基層學生享受到音樂。除咗彈奏古典曲目外，佢哋亦用互動形式，向同學仔介紹每件樂器點用，到佢哋捧腹大笑。表演過後，樂團成員親自指導學校管弦樂團成員，教彈樂器節奏、點與同伴合作等，同學仔都話特別欣賞佢哋專注同活潑嘅風格，仲以佢哋為目標，立志學好音樂。


曾於威廉王子婚禮演奏

學校樂團其中一名低音大提琴手丘同學同Emily講，第一次聽外國樂團表演，早前一知道大名鼎鼎嘅倫敦室樂團會到學校教佢哋，真係既期待又興奮。音樂總監暨首席指揮Christopher Warren-Green話，為威廉王子婚禮表演的確係一大榮幸，但為學生表演更重要，仲笑住講希望王室唔會睇到篇報道啦。


長笛手Karen Jones好謙虛咁話，無論面對乜嘢聽眾，都會付出相同嘅力量同情緒，唔會特別迎合任何人。除咗到本地學校交流外，佢哋聽日同29號會喺樂社舉辦嘅音樂會中演出。