近六成人：青年建事業艱難過父母輩

【明報專訊】政府成日話要增加青少年向上流動嘅機會，但似乎效果不彰。中文大學香港亞太研究所噚日發表一份關於香港青年事業發展機會嘅民調，結果發現有逾半受訪者覺得目前社會給予青年向上流動嘅機會不足。但有43.5%年長受訪者普遍認為後生仔爭取向上流時唔夠努力，而25.2%年輕人就覺得自己已經好努力。


年長者多感年輕人努力不足

調查係喺上月19至23日晚上以電話訪問咗714個18歲或以上嘅市民。政府不時強調北上發展有前途，但逾30%受訪者認為即使去內地發展，都唔會有更大成功機會，只有不足20%嘅人認為有更大成功機會，覺得一半半嘅就有41%。


民調亦發現有近60%受訪者認為時下青年嘅事業發展機會比父母一代差；但亦有逾60%受訪者認為，同上一代比較，家嘅青年人生活水平係好咗。


雖然有過半受訪者認為青年向上流機會不足，但整體而言，有35.6%人認為，後生仔爭取向上流動時所付出嘅努力唔足夠，認為足夠嘅只有13.3%，44.3%就表示一半半。