新華社2600字訪「小花」陳穎欣 話想做大樹 篇幅勝財爺

【明報專訊】25歲嘅工聯會「小花」陳穎欣喺區議會選舉打敗民協馮檢基，備受本地傳媒追訪；小花更成功跳出香港，獲得官媒新華社青睞。噚日新華社刊登一篇題為〈是小花，更希望成為大樹〉嘅陳穎欣專訪，大談佢嘅地區工作心路歷程。成篇「小花」專訪有2600多字，比起今年都曾經接受過新華社專訪嘅財政司長曾俊華、入境處長陳國基同金管局總裁陳德霖嘅篇幅更多。


新華社喺區選結束後兩日，曾經發出題為〈香港區議會選舉空前激烈愛國愛港陣營終成贏家〉嘅稿件，當中提到「更為引人注目的是，愛國愛港陣營中一批新秀順利接棒上位」，估唔到一星期後就刊登小花專訪。專訪中介紹咗小花學歷，又話小花想將來成為強壯嘅大樹。


新華社過去主要專訪香港官員，例如以3600字篇幅專訪特首梁振英談經濟；2300多字文章專訪曾俊華，談及一帶一路等。另外，今年10月新華社亦發文介紹香港理工大學4名畢業生嘅創業經歷。


劉銳紹解釋「重視」原因

時事評論員劉銳紹話，大家可能唔了解內地對香港青年政策，先會對新華社專訪小花感到奇怪。夫子話內地各路人馬喺佔領運動後，花咗好多人力做香港青年嘅研究調查，其中一個結論係要吸納願意喺香港扎根做地區工作、又唔會走上街頭嘅青年，而小花當然屬於呢類人。至於新華社咁「重視」小花，係咪反映小花係中央重點栽培嘅接班人？夫子話視乎小花未來能唔能夠不斷提升自己、唔會被淘汰。