反問錢穆語「你是中國人」講邊個中國？ 新亞學生會挑機沈祖堯

【明報專訊】中大校長沈祖堯前日寫文，話世界盃外圍賽港中大戰嗰陣，中大同學仔噓內地學生唱國歌嘅行為令佢非常失望，叫學生要謹記新亞書院創辦人錢穆所講嘅「你是中國人，不要忘記了中國！」

事緣港中大戰噓國歌

球賽當晚喺中大搞直播嘅新亞學生會噚日就挑機問校長，錢穆所指嘅「中國」究竟係邊一個「中國」，又叫校長要正視歷史。


學生會嘅公開信話，錢穆當年南下香港、創辦新亞，係為咗逃避中國共產黨魔爪，中共領導人毛澤東曾經批評錢穆係「帝國主義及其走狗中國的反動政府」控制嘅「新式的大小知識分子」之一。


而錢穆去咗台灣之後，就再冇踏足大陸，希望校長更正佢嘅講法，唔好引喻失義。


公開信落款亦唔用常用嘅公元紀年，而係「民國一零四年十二月四日」，學生會補充話，用民國紀年係為表達對錢穆嘅尊重。