市集推食物可持續 手工麵包有捧場客

【明報專訊】太古坊同社企honestly green合辦糖廠街市集，希望推廣食物可持續發展，當中嘅舖頭亦積極向市民推廣健康有機食物概念。手工麵包店Levain創辦人嘅爸爸李炳權（圖）話，透過呢類市集可以同客人直接交流。市集客人幫襯過會返嚟，甚至會請教佢哋關於喺屋企整健康麵包嘅問題，但地舖就未必做到呢種交流，「喺地鐵站嗰啲客人，買完就直接走，唔會停低了解麵包」。


李炳權又話香港嘅麵包有好多添加劑等，所以好支持阿仔「食物革命」嘅理念，製作無害地球嘅麵包。李爸爸負責喺戶外推廣，講笑話自己係「人肉錄音機」，將阿仔教佢嘅麵包知識同客人覆述一次。「用天然酵母造嘅麵包，成本貴三分之一，但係麵包嘅彈性顯而易見，撳落去真係會彈番上嚟」。


呂先生夫婦亦專登去買健康麵包，認為家市面上嘅麵包唔健康，「食雞尾包都要挖走椰絲，因為太甜」。