廉署辦標語創作賽 向政府部門偷師

【明報專訊】有逾40年歷史嘅廉政公署（ICAC）首次舉辦「標語及標記創作比賽」，等大家可以一人一句撐廉潔，只要字數唔超過30字（唔包括標點符號），中英文都可以；至於標記就無限制，可以包括任何形式嘅設計或人物造型。


唔少部門多年來都有搞標語比賽，Emily好奇點解廉署到今年先搞，又唔搞吓短片比賽。廉署社區關係處助理處長（署理）陳潔雲話呢類比賽門檻低，男女老少都可以參加，仲話設計比賽時有向其他政府部門取經。至於會唔會好似警隊咁開facebook？佢話由於涉及廉署所有部門，所以要另外討論吓。


有興趣嘅市民可以喺今個月9號至出年2月15號期間遞交作品，贏咗除咗有獎狀、紀念品之外，作品更有機會獲廉署採用。想了解更多詳情可以瀏覽網站（www.icac.org.hk/icac/slogan）。