李雲迪做港青聯副主席 嘉賓狂集郵

【明報專訊】青年一向係國家統戰重點，全國青年聯會亦受內地高度重視，香港全國青聯委員協進會噚日成立，特首梁振英（CY）、中聯辦副主任仇鴻畀面出席，出席唔到嘅中聯辦主任張曉明就送題字畀協進會。不過噚日活動嘅重點，就似乎落咗喺協進會副主席、演奏家李雲迪身上，皆因唔同嘉賓都瘋狂搵佢集郵影相。


李雲迪擔任協進會副主席，活動開始前佢一直企喺嘉賓簽名處無離開過，因唔少出席者都搵佢影相自拍，佢來者不拒。但李雲迪都有搵人集郵㗎，喺典禮上坐後排嘅佢，就一度走到最前搵CY合照。李雲迪早排喺韓國演出時被指忘記曲譜，引起觀眾不滿，其後仲要發表道歉聲明，承認演出失誤。


協會3目標 盼團結港青

青聯一向係富二代、富三代同社會精英嘅團體。協進會聯席主席鄭志剛致辭時話，青聯委員其中一個重要責任係廣泛團結香港青年，培養青年對國家民族認同；又話協進會有3個目標，包括加強委員聯繫、提升委員質素同發揮作用，唔知另一聯席主席施榮忻係咪已經有晒大計打算點發展呢？


協進會搵咗唔少政商界人士做顧問，好似霍震寰、霍震宇兩兄弟，全國政協委員黃英豪、黃楚標等。黃楚標嘅老友立法會議員張華峰因收到冒認黃楚標嘅電話被騙9萬元，黃楚標噚日無現身活動。