袁國強復工：腸出問題 詳情不便講

【明報專訊】律政司長袁國強上星期因「腸部不適」入咗醫院，噚日重返工作崗位，佢話仍要食藥覆診，但應該可以應付工作。袁司長噚日講嘢時都有啲虛弱，記者梗係關心佢患咩嘢病、點解會肚痛，袁司長多謝大家關心，但就保密病情，「簡單來說就是腸部出現問題，詳情不太方便說」。


袁司長話，佢上星期日晚上開始唔舒服，上周一下晝去睇醫生，醫生同佢講，如果腹部再痛得厲害，就可能要入醫院。佢話上周二上午換衫返工時痛得比較厲害，所以入咗醫院檢查，仲立即安排做咗CT scan（電腦掃描），之後醫生認為應該要留院。佢又話醫生用咗較重嘅藥，希望幫助佢快啲康復，但都要搞到上周五先可以出院。


袁司長近期都唔係第一次病倒，但佢話可以應付工作，又話以前私人執業時工作壓力一樣大，而「間中生病沒有人想的」。