唐唐主理基金 捐上海交大4250萬

【明報專訊】全國政協常委唐英年係江蘇人，家族同上海交通大學有好深淵源，佢爺爺唐君遠就曾經喺交大前身南洋公學讀化工、外公尤寅照亦係上海交大畢業生。唐唐主理嘅教育基金，噚日就向上海交大捐咗4250萬人民幣，希望幫助交大培訓人才，為國家發展軟實力出一分力。


唐唐噚日出席捐贈簽約儀式，又同當地師生分享（圖），佢話大學係培養人才嘅搖籃，現時國家硬實力好似基礎配套設施發展成熟，未來必須要有軟實力配合，培訓人才係重中之重。今次向交大捐咁大筆錢，主要有兩個項目，包括支持交通大學密西根學院本科優秀學生，去美國密西根大學攻讀雙學位課程；同埋設立「唐君遠講席教授基金」，支持交通大學同密西根學院嘅師資隊伍建設，引進高層次高素質嘅國際知名教授。