游蕙禎捕獲葉國謙 約實民記傾版權例

【明報專訊】幾個傘後團體同網民組織最近不斷約見各政黨嘅立法會議員，表達對《2014年版權（修訂）條例草案》嘅訴求。呢班後生仔早排曾經寄電郵去民建聯，但收唔到回覆。


點知有幾個傘兵噚日喺立法會外野生捕獲民建聯立法會議員葉國謙，青年新政成員游蕙禎即刻同阿謙講，希望可以約見民建聯議員。女神游蕙禎一出馬，立即成功爭取到今日同民建聯議員見面。


泛民承諾下周二讀積極發言

Emily噚日問在場嘅東九龍社區關注組成員陳澤滔，佢同Emily講，游蕙禎當時向阿謙話，希望可以見面講吓年輕人聲音，之後就收到回應話可以今日見。


另外，傘後組織成員噚日同泛民主派政黨見面游說，包括公民黨、工黨、民協、街工、民主黨同資訊科技界立法會議員莫乃光，大家見咗大約一粒鐘。青年新政會後喺facebook話，泛民議員都承諾下星期立法會恢復二讀條例草案會積極發言，希望議會內外繼續抗爭，可以拉倒議案。


今日除咗同民建聯見面，傘後團體代表亦會游說醫學界立法會議員梁家騮。