李卓人工黨交棒 換屆唔選主席

【明報專訊】新舊交替係政黨近年嘅大趨勢，工黨嚟緊星期日（13日）舉行嘅會員大會，會選出新主席同執委，做咗4年主席嘅李卓人（阿人）決定唔再競逐主席，正式交棒。阿人話，其實喺區選之前已經諗過交棒，希望畀新生代累積經驗、承擔主席職務，做好傳承工作。佢又話希望畀唔同嘅面孔做主席，可以營造黨內民主參與嘅氣氛，畀大家發揮一下新思維，而自己就只會選執委，強調無話特別想邊個接捧。


明年仲會唔會競逐連任立法會新界西直選議席呢？阿人話要等黨內傾，黨內家未有醞釀，亦話選唔選唔係個人考慮，而係要確保工黨以至成個泛民拎到最好成績，維持喺議會嘅否決權。


工黨秘書長郭永健、副主席鄭司律同前執委胡穗珊會競逐黨主席，何秀蘭同阿人一樣會交棒，唔競逐副主席，只會選執委。