股神簽名師傅舊書 賣20萬

【明報專訊】股神巴菲特溢價認真厲害，因為佢嘅簽名，一本出版了50年嘅財經書，竟可以賣到2.5萬美元，即19.5萬港元。小琴講緊嘅係，日前喺美國舊金山一個拍賣會上，一本有巴菲特親筆簽名、巴菲特師傅格拉罕（Benjamin Graham）嘅大作《聰明的投資者》（The Intelligent Investor）第一版，以2.5萬美元拍賣高價成交，拍賣所得將用作慈善用途。

1949年《聰明的投資者》首次出版時，本書只係賣3.5美元。今次拍賣買入呢本書嘅係洛杉磯基金公司Canyon Partners LLC嘅創辦人朱利斯（Mitch Julis）。朱利斯係格拉罕理論嘅信徒。

巴菲特曾經喺《聰明的投資者》第4版前言中曾寫道：「我在1950年初讀到了這本書的第一版，當時我只有19歲。那時候我就認為它是迄今為止最好的一本關於投資的書。現在我依然這樣認為。」本書第4版於1973年面市。

好可能係初版唯一簽名書

今次係舊金山嘅「兒童事務卓越投資基金」，向紐約嘅書商B&B Rare Books Ltd.，以較低嘅價格買入呢本經典書，然後進行拍賣，所得款項會作慈善用途。該基金嘅創始人之一沃爾夫話，巴菲特話過，記憶之中沒有喺其他《聰明的投資者》初版上留低過筆迹。因此初步推斷呢本書係唯一一本有股神簽名嘅初版書，而巴菲特嘅助理凱澤（Carrie Kizer），亦證實咗沃爾夫上述說法嘅真實性。

報料電郵﹕piano@mingpao.com