有話說﹕自家製Playgroup 保證唔執笠

【明報專訊】上月尾有playgroup忽然停業更涉及金錢騙局，Happy Mama都以為係個別例子，點知上星期再有一單，搞到Mama啲朋友仔人心惶惶。無他嘅，呢個年代，只要你有小朋友，就必然會帶佢去上playgroup，但係市面上playgroup多不勝數，始終良莠不齊，無人敢保證邊間一定唔執笠。


你以為Mama啲朋友係怪獸家長，要仔女未夠兩歲去學齊兩文三語中英數？梗係唔係啦，Mama唔少朋友話帶仔女上playgroup嘅目的，並唔係要佢學呢樣學嗰樣，而係學吓社交喎。鬼咩，依家個個生仔都係一個起兩個止，連同人溝通都要畀錢學！之不過咁，Mama認為返playgroup並唔係學社交嘅唯一出路，例如約朋友嘅仔女去郊外跑跑跳跳都一樣得，呢啲免費playgroup就夠划算啦。


早前Mama先同智樂兒童遊樂協會總幹事王見好（Kathy）傾過，佢都相信小朋友需要遊戲，亦認為坊間嘅遊戲小組（playgroup）係其中一種選擇，但就視乎家長點揀。「小朋友遊戲本應以兒童為本，遊戲時應該讓孩子話事，所以，如果遊戲小組有太多成人的期望或口味，如遊戲小組學英語，對小朋友來說，參與遊戲小組只是配合大人安排，而不是自由自在地玩，不太符合兒童遊戲的基本要求，小朋友也不會太過享受。」


玩遊戲變學習 小朋友點享受

佢仲話如果係想畀小朋友開心遊戲，其實喺屋企搵一大堆曬衣夾、廁紙筒、廁紙盒都可以玩成個下午；如果想畀獨生子女開展社交，又可以到鄰近遊樂場或同其他媽媽自組遊戲活動，咁就會更加配合小朋友喜好同成長步伐。似乎Mama嘅觀點同Kathy都非常啱嘴形，今個周末又係時候約班朋友仔出嚟玩啦！