蘇錦樑再送包點 難阻狂點人數

【明報專訊】自從上周立法會流會後，商務及經濟發展局長蘇錦樑呢兩日都親自坐鎮立法會，遇到有「拉布」議員要求點算法定人數，就親自出馬用短訊甚至真人溫馨提示議員返會議廳。唔知係咪蘇局長相信「雞髀打人牙骱軟」，繼前日請人食蛋撻等，噚日一早就有議員發現，蘇錦樑又買咗一堆菠蘿包、雞批等招呼議員，仲寫明由佢送出。


人民力量陳偉業（大嚿）噚日喺facebook上載呢堆食物相，但就寫明「咭片局長繼續攏絡議員，但不少保皇議員話﹕『咁cheap嘅』！」不過大嚿就無透露有邊啲議員嫌蘇局長啲食物cheap。大嚿下午就上載一張果籃相片，話有人下午加多個果籃，但無留名牌。唔通呢個果籃係蘇局長聽到議員「民意」後加碼贈送嘅？


不過，食物攻勢對議員似乎無乜效，點人數問題仍然嚴重，大嚿就笑言，「由昨天（前日）至今已點人超過三十多次，仍未流會，不知是否與蛋撻，雞批，波（菠）蘿包等有關？」