催魂鐘暫停 立會休假兩星期

【明報專訊】經歷一連3日嘅聽「催魂鐘」、呆坐等點人數，立法會都開始放聖誕假，大會要喺明年1月6日朝早9時先再復會，噚日中午近1點夠鐘休會，主席曾鈺成都鬆一口氣，話可以唞一唞，暫停兩星期唔使聽「催魂鐘」。


喺立法會困咗咁耐，真係要關注一下精神健康，所以唔少議員都趁聖誕假期離港小休叉叉電，好似民主黨單仲偕，今日就會同家人飛去日本北海道滑雪，仲去成10日。


而自由黨田北俊噚日已經同阿女一家去美國三藩市度假。不過，有唔少議員留港，好似公民黨梁家傑、自由黨鍾國斌，都因阿囡喺外國返香港，今個聖誕就會留喺度聚天倫。


汲特首教訓 聖誕合唱唔上載

民主黨立法會議員噚日就同一班黨友及職員搞大食會，提早慶聖誕，而民主黨歌王涂謹申，仲好認真咁帶頭領唱聖誕歌，但汲取特首梁振英「喜歡你」嘅教訓，佢哋無將唱歌短片放上facebook，咁就應該無引起版權費嘅問題。