遊港中獎當騙局 台客享38萬招待

【明報專訊】唔使花費豪玩香港，唔係騙局呀！旅發局夏天搞嘅「香港Fun 享夏日禮」，抽出10名幸運旅客重返香港享受「百萬富翁遊香港」待遇，除咗坐商務機位、住五星酒店，仲有得食米芝蓮餐廳美食等。當中一對中獎嘅台灣夫婦，呢個禮拜重臨香港，享受咗38萬元款待。


「一開始大家都以為是假的。」嚟自花蓮嘅得獎者林維毅話今次「超級幸運」，啱啱知道得獎嗰陣都唔敢相信，直至嚟到香港，先知道係真。雖然已經第三次嚟，「景點差不多都走過」，但始終無緣去馬場同太平山睇夜景。


最愛香港美食嘅林生林太，每次嚟都去茶樓食點心，林生仲話台灣點心「沒那麼好吃」。他們這次來港，仲食咗7間米芝蓮星級餐館嘅美食，林太話印象最深刻嘅，係米芝蓮3星嘅Bo Innovation。「菜好多，真的花了3個小時才吃完」，林太話米芝蓮餐廳比較貴，若平常自己嚟唔會食，今次令佢體驗到非一般嘅餐廳。


嘆港節奏急 點餐感壓力

攞到DFS送出1萬元禮品卡嘅林生，買咗真皮小錢包同真皮背包，林太就買咗化妝品。林生話香港「腳步太快太繁榮」，呢幾日喺唔同景點同食肆「走來走去感覺好累」。佢話可能香港嘅生活節奏太快，有時去餐廳點餐都有壓力。