小股東鬧阿里影業：買完股應做嘢！

【明報專訊】阿里影業（1060）噚日舉行股東特別大會，畀股東舉手睇吓批唔批准公司向阿里巴巴收購網上電影售票業務同娛樂寶，難得終於有啲業務可以搞吓，通過都應該十拿九穩，但在場竟有位小股東喺門外吐苦水，好勞氣話阿里影業「根本無做嘢」，大鬧啲財演「吹到上天」。


伯伯自稱代人持1手阿里影業，佢就好勞氣，話啲財演吹到娛樂寶市值1000億元，而家只係用40億買係好抵，伯伯就質疑「有無咁大隻蛤蜊隨街跳？」伯伯話買完股票，間公司要做嘢，但阿里影業又唔做電影，而家只係「現金公司」、「買完股票要做嘢㗎嘛！」。佢仲教記者睇公告，會發現阿里影業授出購股權之後無咩人認購，「員工都唔畀面佢呀」，批評得體無完膚。


不過，各位股東最擔心嘅可能都係阿里影業業務唔夠多，所以今次收購議案都獲逾99%票數通過，唔知伯伯係咪其中一票呢？

email: [email protected]

[小琴密語]