CY要地起樓 葉劉唱反調

【明報專訊】「任何拖慢土地供應的動作，客觀上都會減少供應，增加樓價和租金的上升壓力，最後，是誰受害？是誰得益？」特首梁振英（CY）今年8月喺網誌已批評有人阻住政府搵地，而近期亦多次話政府要改劃土地建屋，叫地區人士要有同理心，唔好阻住。身兼行政會議成員嘅新民黨主席葉劉淑儀（右），理應支持政府覓地建屋，但葉太噚日就反而拉埋黨友去搵發展局長陳茂波（左），話要反對政府喺選區搶地起樓。


葉太喺facebook話，噚日率領南區區議員陳家珮去咗發展局搵官員，話要反映鴨脷洲居民嘅強烈不滿，原因係政府打算改劃鴨脷洲利南道一幅政府土地，由現時嘅香港駕駛學院改劃為私人住宅發展，呢幅地最高可建110米，提供1416個住宅單位。


為1400多個家庭提供居所，有咩問題呢？葉太都話，南區居民係明白香港唔夠土地建屋，但佢哋有一堆理由去反對喺區內起樓，包括喺掘頭路建「豪宅」，等同增加4000至5000人口，咁條道路就容納唔到咁多車；又話泊車位唔夠，而土地又近石油氣庫等等，好危險喎，所以指選址錯誤。


CY成日批評有人提出司法覆核阻土地改劃用途，但可能最先需要擺平嘅係建制派盟友。