良心基金經理建議客戶贖回

【明報專訊】正所謂「金融界最講求誠信及人格」，相比香港部分嘅金融界立法會議員，內地嘅A股基金經理可能更有良心。A股喺2016年開年不利，僅大半日就被熔掉，小琴聽講唔少內地基金經理都叫大家降低今年收益率嘅預期，不過都唔夠以下呢位「良心經理」咁大膽，直頭建議客戶贖回基金。


良心經理來自興業全球嘅呂琪，噚日喺微信朋友圈鄭重提示，建議客戶贖回，表示「今年本人管理產品大概率不能賺錢」。行家們紛紛留言稱佢為「業界良心」，難為公司為應對大量突如其來嘅媒體查詢，只能弱弱講一句「此為基金經理個人的判斷，不代表公司的觀點」。


呂琪管理嘅都係專戶產品，門檻至少過百萬，但資料並無公開，有內地媒體就八到，佢管理嘅5隻產品，2015年業績通通翻倍。但如今佢賭上嘅不單是公司利益，仲有自己嘅前途，去發表肺腑之言，睇嚟投資者真係要聽聽呢位「老朋友」嘅勸告。


email: [email protected]

[小琴密語]