朗廷進軍卡塔爾 望佢成功主辦世盃

【明報專訊】大家都知道中東有間帆船酒店好出名啦，加上中東嘅資源咁豐富，人又有錢，好多集團都想喺中東開番間酒店，享受吓中東繁榮嘅成果嘛。小琴先前已報道，鷹君（0041）旗下嘅朗廷酒店集團已決定進軍中東，不過詳情係噚日記者會才公布。

佢哋啱啱簽咗個管理協議，將會喺中東卡塔爾首都多哈開設第一間朗豪酒店，有成250間房，仲會喺後年開幕㖭。

集團銳意發展「新絲路」

原來朗廷近年都銳意發展「新絲綢之路」，咩係「新絲綢之路」？其實係由中東到印度，再接駁到中國嘅21世紀貿易航線喎。

話時話，對於卡塔爾嘅認識，小琴只係記得某一年嘅亞運喺卡塔爾首都多哈舉行，但講旅遊業就應該係迪拜蓬勃啲丫，所以小琴就諗極都唔明點解朗廷會揀喺多哈開酒店。朗廷行政總裁貝秉智就同小琴解釋話，佢哋係中東嘅目標顧客係商務旅遊人士，而喺多哈就有好多呢類嘅客人，加上卡塔爾家角逐緊2022年嘅世界盃主辦權，如果成功就可以好似今年南非世界盃咁，吸引好多遊客嚟喎。