內地客成倫敦豪宅最大買家

【明報專訊】隨着中國發展得愈來愈好，中國人開始識得跳出中國投資，小琴講緊嘅係中國人去外國置業嘅情况。內地人嚟香港買樓就見得多，但係原來好多中國內地人同香港人，都好喜歡去外國置業，最近有一個位於倫敦市中心嘅物業，嚟咗香港做展銷，根據佢哋嘅代理商恒邦國際嘅數據，今個夏天中國人成為倫敦市中心物業嘅最大買家，連英國本地人同鄰近嘅歐洲人，都唔及中國人買得咁多！

恒邦國際個數據顯示，今個夏天喺英國倫敦置業嘅中國人佔比係24％，比起歐洲（23％）同英國人（12％）都多，而嚟自中東嘅買家亦唔少，有成15％。

今夏倫敦置業 中國人佔24%

恒邦國際銷售董事張淼金話，今次喺倫敦市中心推售嘅物業叫Grafton Way，只有12個單位，建築物喺1777年已經建成，屬於歷史建築物，只可以翻新內籠出售，周圍又有大學同藝術館，文化氣息好強。而發展商Tiuta PLC本來係做物業貸款業務，今次見到個物業質素好好，所以就自己做埋發展商喎。

今次個物業最有趣嘅地方，就係個物業未喺英國推售，就率先攞咗嚟香港賣，仲已經賣出咗2間添，證明中國人嘅市場真係好有潛力呀！據知買咗2個單位嘅都係香港人，係買嚟畀啲仔女過去讀書時住嘅，張淼金仲話有信心今個星期賣晒全部12個單位㖭。而呢個物業嘅平均呎價係959英鎊，大概係11923港元，同香港嘅豪宅相比都唔係貴呀！

吸引中國人喺英國置業嘅原因，仲有係因為人民幣升值，令到佢哋喺英國買樓有得打折，而且業主如果唔係居住喺英國，就唔洗畀資本增益稅，租金回報高達4至5厘，所以預期未來會有更多中國人喺英國置業喎。

報料電郵﹕piano@mingpao.com